Friday, December 27, 2013

ကြီးကျယ်ခန့်ညား၊ ပင်လယ်ခရီးသွား သူရဲကောင်းများ။ /

ကမ္ဘာကျော်ပန်းချီဆရာ ပီကာဆို က သူ့အမေပြောခဲ့တာလေးကိုပြန်သတိ၇ရင်း ပြောပြခဲ့တာ တစ်ခု ကတော့ (( စစ်သားဖြစ်ခဲ့မယ်ဆိုရင် စစ်ဗိုလ်ချုပ်မှူးကြီးဖြစ်အောင်ကြိုးစားပါ။ ဘုန်းကြီးဝတ်ဖြစ်ခဲ့မယ် ဆိုရင်လည်း ဂိုဏ်းချုပ်ပုတ်ရဟန်းမင်းကြီးဖြစ်အောင်ကြိုးစားပါတဲ့ ။ ဒါပေမဲ့ငါကတော့ပန်းချီဆရာဖြစ်လာပြီး ပီကာဆို ဖြစ်လာခဲ့တယ်)) တဲ့။ အရမ်းကောင်းတဲ့ စကားစု တစ်ခုပါ။ ။ IMO နှင့်အခြားအဖွဲ့များဧ။်ဆန်းစစ်လေ့လာချက်များအရ၊ကမ္ဘာ့လူသားများအသက်ရှင်နေထိုင်ရေးအတွက်လိုအပ်ချက်ကိုဖြည့် ဆည်းပေးနေသောပစ္စည်းများအားလုံးရဲ့ (၉၀%) ဟာရေကြောင်းနဲ့ တစ်နည်းမဟုတ်တစ်နည်း၊ ပါဝင်ပတ်သက်ပြီးမှ လူတွေရဲ့ လက်ထဲရောက်ခဲ့တာချဉ်းဘဲ ဖြစ်ပါတယ် တဲ့။

တစ်နည်းပြောရရင်ကမ္ဘာ့ကုန်သွယ်ရေးရဲ့အဓိကကုန်စည်ဖလှယ်မှု (၉၀%) ကို ရေကြောင်း ကဘဲ လုပ်ခဲ့တာလို့ပြောရင်ရပါတယ်။ ။ နောက်ထပ်ဆန်းစစ်လေ့လာချက်များအရ၊ ရေကြောင်းအခြေခံကုန်သွယ်ခြင်း ( သို့ ) ကုန်စည်ဖလှယ်ခြင်းကိုအစားထိုးဖို့ တခြားနည်း နောင်အနှစ်(၁၀၀) အထိမပေါ်နိုင်သေးဘူး ဆိုတာပါဘဲ။ ခရစ်တော်မပေါ်ခင် ဖိုနီးရှန်းများနှင့်အီဂျစ်များ၊ နောက်ဂရိ နှင့် ကာသေ့ လူမျိုးများ၊ နောက် တရုတ်နှင့် ဗိုက်ကင်းများ၊ အိုမန်နွယ်ဖွားများ၊ နောက် ဥရောပမှ စပိန်၊ ပေါ်တူဂီ၊ အီတလီ၊ ပြင်သစ်တို့ နှင့် အင်္ဂလိပ်အဆုံး အကုန်လုံးဟာရေကြောင်းနဲ့ လူစွာ လုပ်ကုန်သွယ် ခဲ့ကြတာပါဘဲ။ လက်ရှိ Globalization အရ ကုန်ပစ္စည်းအမှတ်တံဆိပ်တစ်ခုဟာကောင်းပြီ ဆိုရင် နိုင်ငံနယ်နမိတ်မရှိတော့ဘဲ တစ်ကမ္ဘာလုံး တမဟုတ်ချင်း ပျံ့နှံ့သွားတာရယ်၊ ချမ်းသာ တဲ့နိုင်ငံကြီး တွေက လုပ်အားခသက်သာသော ဖွံ့ဖြိုးစနိုင်ငံတွေမှာ စက်မှုလုပ်ငန်းဆိုင်ရာ နယ်ကျော်ရင်းနှီးမြုပ်နှံခြင်းများရယ် စသဖြင့် အသစ်သစ် ပေါ်လာသောလုပ်ငန်း များက လည်း ရေကြောင်းလောကကို ပိုပြီး ဖွံ့ဖြိုးစည်ပင် စေခဲ့ပြန်ပါတယ်။

စည်ပင်ခဲ့စေရုံမကပါဘူး၊ ခေတ်မီ နည်းစနစ်များကရေကြောင်းလောက ရဲ့အဓိကဇါတ်ကောင်သင်္ဘောများ ကိုလည်း၊ အာကာသယာဉ် တစ်စီးကဲ့သို့ ဖြစ်အောင်တိုးတက် စေခဲ့တယ်ဆို ရင်မမှားပါဘူး။ တက်မနဲ့ရွက်ဘဲ သုံးခဲ့တဲ့ခေတ် ကနေ အခု “ Computor Mouse “ ကိုင်မောင်း ရတဲ့ခေတ်ရောက်လာတာ ကိုကြည့် ခြင်းအားဖြင့်၊ မည်၍ မည်မျှ တိုးတက်လာခဲ့တာကို မှန်းလို့ရပါတယ်။ အဲဒီထက်တိုးတက်ဖို့ဘဲ ရှိပြီး၊ နောက်ပြန်လှည့် ဖို့ ကိုအကြောင်းမရှိပါဘူး။ ။ နောက်ဆုံးဆန်းစစ်ချက်တစ်ခုအရ တစ် ကမ္ဘာလုံးအတိုင်းအတာနဲ့ ရေကြောင်းလောက ရဲ့သင်္ဘော မျိုးစုံ (၇) သောင်းကျော်ဟာ ကုန်မျိုးစုံကို တစ်နှစ် ပျမ်းမျှခြင်း တန်ချိန် (၈) ဘီလျံ ၀န်းကျင်ကို (၁၉၇၀) မှယခုအချိန် အထိ သယ်ယူပို့ဆောင်ပေးခဲ့တယ်လို့ မှတ်တမ်းများကဖေါ်ပြထားပါတယ်။ စီးပွားပျက်ခဲ့တဲ့ (၁၉၉၇/၂၀၀၈) လိုနှစ်တွေမှာတောင် (၇) ဘီလျံ လောက်ထိရှိနေခဲ့တုန်းပါဘဲ။ (၂၀၁၀) ခုနှစ် IMO စာရင်းဇယားများအရ တစ်ကမ္ဘာလုံးအတိုင်းအတာနဲ့ ဆီမျိုးစုံ တန်ချိန် (၂.၇၅၂)ဘီလျံ ၊ Bulk Cargo အမျိုးစုံ တန်ချိန် (၂.၃၃၃)ဘီလျံ ၊ နဲ့ အခြားကုန်မျိုးစုံ တန်ချိန် (၃.၃၂၃)ဘီလျံ ကိုရွှေ့ပြောင်းသယ်ယူပေး ခဲ့တယ်လို့ ပါလာပါတယ်။ ဒေါက်တာမာတင်စတက်ဖို့( ဒ်) ( Clarkson Research Svcး ) ရဲ့လေ့လာချက် စာတမ်းအရ နောက်လာမည့် (၂၀၆၀) မှာ လက်ရှိဖြစ်နေတဲ့ ကုန်ဖလှယ်မှု (၈) ဘီလျံတန် ကနေ (၂၃) ဘီလျံ တန်အထိ တိုးတက်လာနိုင် တယ်လို့ဆိုထားပါတယ်။ (၃၀၀%) တိုးတက်ခြင်းပါ။ တစ်ဆက်တည်းမှာဘဲ အြိန္ဒိယနိုင်ငံ နဲ့ တရုတ်နိုင်ငံတွေဟာ ကမ္ဘာ့ကုန်သွယ်ရေးကို ဦးဆောင်တဲ့နိုင်ငံ တွေ ဖြစ်လာမယ်ဆိုတာပါဘဲ။ သိပ်တော့လည်းမဆန်းပါ။ (လူများရင်ပွဲစည်) စီးပွားရေးသီအိုရီက ကမ္ဘာ့ စီးပွားရေးကို ထိန်းချုပ်ထား သလိုဖြစ်နေတာ ကြောင့်လည်း ပါပါတယ်။ ။ နောက်ထပ်ဆန်းစစ်ချက် ဂဏန်းတစ်ခုကိုဆက်ရေးရရင် ၂၀၁၁ခုနှစ် စာရင်းဇယားများအရ ကမ္ဘာပေါ်မှာ ကုန်တန်ချိန် (၁၀၀) အထက်တင်နိုင်တဲ့ သင်္ဘောပေါင်း (၅၅ ၀၀၀) ကျော် ရှိရာမှာ၊ နိုင်ငံပေါင်း (၁၅၀) မှ သင်္ဘောသားပေါင်း (၁.၅) မီလျံကျော်အလုပ် တာဝန် ထမ်းဆောင် နေတယ်လို့ဆိုပါတယ်။

တစ်နည်းပြောရရင်ကမ္ဘာ့ကုန်သွယ်ရေးဇာတ်ခုံမှာ လူသား အကျိုးပြု ပြဇာတ်အတွက် ကပြအသုံးတော်ခံနေ တဲ့ ဇာတ်လိုက်ကျော် သင်္ဘောများကို မောင်းနှင် ကိုင်တွယ်နေတဲ့ သူရဲကောင်း မင်းသားအကျော်အမော် ၁.၅ မီလျံကျော်ရှိတယ် ဆိုရင်မမှားပါဘူး။ ဇာတ်လိုက်ကျော် သင်္ဘောများ အကြောင်းပြီးရင် ပြဇာတ်မှာ တစ်ဆက်တည်း ပါနေတဲ့ ဇာတ်ပို့များ အကြောင်းပါဆက် ရေးရပါမယ်။ ။ ကမ္ဘာ့ရေကြောင်း ကုန်သွယ်ရေး မှာ ဆိပ်ကမ်းကောင်းများမရှိရင် ရေကြောင်းလောကကြီး တိုးတက်လာစရာမရှိပါဘူး။ သင်္ဘောဆိပ်ကမ်းကောင်းများ ဆိုတဲ့ အပိုင်းကိုကြည့်ရင် နိုင်ငံ တစ်နိုင်ငံ တိုးတက်၏၊ မတက်၏၊ ကို ခန့်မှန်းကြည့်လို့ရပါတယ်။ ကမ္ဘာ့စီးပွားရေး အတိုးတက်ဆုံးဖြစ်တဲ့ တရုတ်နိုင်ငံမှာ ကမ္ဘာ့အဆင့်မှီ ဆိပ်ကမ်းပေါင်း (၃၈) ခု (ဆောက်လက်စမပါ) ရှိပါတယ်။ အဲဒီအထဲမှာ ကမ္ဘာ့ထိပ်တန်းဆိပ်ကမ်း (၅၀) စာရင်းဝင်တဲ့ ဆိပ်ကမ်း (၁၀) ခုရှိပါတယ်။ အထက်ပါဆိပ်ကမ်းတွေကတော့ ကုန်သေတ္တာအခြေခံကုန်များကို အတင်အချလုပ်တဲ့နှုန်းပေါ် မူတည်ပြီးသတ်မှတ်ထားတာပါ။ ဒါပေမဲ့ ဆီသင်္ဘောအတင်အချ၊ Bulk Cargo အတင်အချ တွေပါ ထည့်တွက်ရင်လည်း ထိပ်တန်း ကမဆင်းပါဘူး။ နိုင်ငံတစ်နိုင်ငံ တိုးတက်ဖို့အတွက် ကုန်သွယ်ရေး လုပ်ငန်း လုပ်ကိုင်နိုင်ဖို့ ဆိပ်ကမ်းကောင်းများလိုအပ်တယ် ဆိုရင်မမှားပါဘူး။ ကမ္ဘာ့ထိပ်တန်း ပထမ နေရာက ဆိပ်ကမ်းဖြစ်တဲ့ ရှန်ဟိုင်း ဆိပ်ကမ်းဟာ ပုံမှန် ကုန်သေတ္တာပေါင်း တစ်နှစ်ကို (၃၂) သန်း အတင်အချလုပ်နေခဲ့ပါတယ်။ စင်္ကာပူကတော့ (၃၁) သန်း နဲ့ ဒုတိယ ပါ။ ဟောင်ကောင် က (၂၆) သန်းနဲ့ တတိယ၊ ရှန်ဇန် က (၂၃) သန်း နဲ့ စတုတ္ထ၊ ပြီးတော့ အစဉ်အတိုင်း ဘူဆန်၊ နင်ဘို၊ ကွမ်ကျိုး၊ ရှင်တောင်း၊ ဂျဘယ်အလီ(ယူအေအီး) နဲ့ ရော့(တ)တာဒန်(နယ်သာလန်) က ဒဿမမြောက်မှာ ရှိပါတယ်။ ထိပ်တန်း ၁၀ ခုယှဉ်တဲ့အထဲမှာ အာရှတိုက်ကချဉ်းဘဲ (၉) ခုပါတာကိုကြည့် ခြင်းအားဖြင့် ဘယ်လိုနေရာမှာ စီးပွားရေးအင်အားရှိနေတယ်ဆိုတာကို ခန့်မှန်းလို့ရပါတယ်။

ထိပ်တန်းသင်္ဘောကုမ္ပဏီ (၁၀) ခု ထဲက (၆) ခုဟာ အာရှ ကပါ။ အဲဒီမှာစီးပွားရေးတိုးတက်မှု၊ ကုန်းတွင်းပိုင်းနဲ့ပင်လယ်ကမ်းနားပိုင်းတွေ ကွာခြား မှုကြောင့် ပြဿနာ ပေါင်းစုံ ကြုံတွေ့ နေရတဲ့ တရုတ်နိုင်ငံမှာ၊ တိုးတက်မှုနှေးကွေးတဲ့ ကုန်းတွင်းပိုင်းကို စီးပွားရေးလမ်းပွင့် အောင်အားထုတ်တဲ့ အနေနဲ့ မြန်မာနိုင်ငံ ကျောက်ဖြူမှာ ပင်လယ်ရေနက်ဆိပ်ကမ်းမရအရ လာဆောက်တာကဘဲ စီးပွားရေးတိုးတက်ရေးမှာ ဆိပ်ကမ်းတွေနဲ့ ရေကြောင်းကုန်သွယ်မှုဘယ်လို အရေးပါတယ်ဆိုတာမှန်းလို့ရပါတယ်။ ။ အဲဒီမှာမြန်မာနိုင်ငံရဲ့အနေအထားပုံစံကိုပြောရရင် က မ္ဘာ့စီးပွားရေး ဦးဆောင် ထိပ်တန်းနိုင်ငံ များဖြစ်လာမယ့် ၀ါဒမတူ ဒီမိုကရေစီ နိုင်ငံ အိန္ဒြိယနှင့် ကွန်မြူနစ်နိုင်ငံတရုတ်ကြားမှာ ပထ၀ီဝင် အနေအထားအရရှိနေပါတယ်။ (လူများပွဲစည်) စီးပွားရေးသီအိုရီအရ ၎င်းနှစ်နိုင်ငံ အတွက် အကောင်းဆုံး ထောက်ပံ့ပေးနေတာက သူတို့နိုင်ငံကလူဦးရေပါ။ သူတို့နိုင်ငံမှာ ဥာဏ်အားမလို ကာယအားကိုး အလုပ်လုပ်နိုင်သူတွေမရေမတွက်နိုင်အောင်ရှိသလို၊ ဥာဏ်အားသုံးပညာတတ်တွေ၊ အိုင်းစတိုင်းနီးပါးတော်သူ ဥာဏ်ကြီးရှင်များကလည်းထုနဲ့ဒေးပါ။ အဲဒီနှစ်နိုင်ငံက ခံယူတဲ့ဝါဒမတူ၊ ဘာသာမတူ၊ အသွေးအရောင်မတူ၊ မတူတာတွေ အရမ်းများပေမဲ့ တူတာကတော့တစ်ခုရှိပါတယ်။ တိုးတက်အောင် ကျားကုတ် ကျားခဲ ကြိုးစားကြပုံချင်းအတူတူပါဘဲ။ အဲဒီတော့ အဲဒီနိုင်ငံတွေနဲ့ ယှဉ်ချင်ရင် ဒါမှမဟုတ် အမှီလိုက်ချင်ရင် အဲဒီနိုင်ငံကလူတွေ လိုကြိုးစားရမှာ ကတော့ငြင်း မရပါ။ မြန်မာနိုင်ငံ ရေကြောင်းလောက သူရဲကောင်းများအနေနဲ့ ကမ္ဘာ့အလယ်မှာ ၂၁ရာစု ရောက်ပြီး နောက်ပိုင်း နေရာရမှု နည်းလာတယ် လို့ပြောရင်လည်းရပါတယ်။ တခြားနိုင်ငံတွေက တိုးတက်သွားပြီး ကိုယ့်နိုင်ငံက ၂၀ ရာစု မှာ ကျန်ခဲ့ လို့လည်း ပြောရင်ရပါတယ်။ အသိဥာဏ် ပညာအဆင့်အတန်းရယ်၊ လုပ်ရည်ကိုင်ရည်ရယ် အပိုင်းတွေမှာ နိုင်ငံတကာ မှာရှိတဲ့ ၂၁ရာစုရဲ့(စံ) တွေနဲ့ ယှဉ်ရင်နိမ့်ကျလာခဲ့တဲ့အတွက်လည်းပါပါတယ်။ တာဝန်ရှိတာကတော့ ရှေ့က ဦးဆောင်သွားခဲ့ သူများရဲ့ မပြတ်သားမှု၊ လက်ရှိလုပ်နေတဲ့သူများရဲ့ ညံ့ဖျင်းမှု၊ လုပ်ချင်နေသူများရဲ့ မကြိုးစားမှုများ ကြောင့်လဲပါပါတယ်။ လက်ရှိလုပ်နေတဲ့ သူများ အထဲမှာ ဒီစာစုကို ရေးနေသူ ကတော့ ညံ့တဲ့အပြင် အညံ့ဆုံးထဲ ပါပါတယ်။

အပြစ်ရှာပြောနေမဲ့အစား လက်ရှိရောက်ရာနေရာ ကနေ အကောင်းဆုံး ဖြစ်အောင် ကြိုးစားပြီး၊ အကောင်းတကာ့အကောင်းဆုံး ဖြစ်အောင် ကြိုးစား နေရမှာကတော့ မြန်မာ့ရေကြောင်းလောကသား သူရဲကောင်းတိုင်းရဲ့တာဝန်ပါ။ ။ ကမ္ဘာ့ထိပ်တန်းအချမ်းသာဆုံးဖြစ်ခဲ့ကြတဲ့ ဘီလ်ဂိတ် တို့လို၊ လီကာရှင်း တို့လိုလူတွေဟာ ကိုယ့်အားကိုယ်ကိုး စွန့်ပြီးကြိုးစား ခဲ့ကြလို့အဲဒီနေရာကိုရခဲ့ကြတာပါ။ နံမည်ကျော် ခရစ္စတိုဖါကိုလံဘတ် ဟာ ယက္ကန်းရုံပိုင်ရှင်ရဲ့ သား မျှသာဖြစ်ပါတယ်။ ဒါပေမဲ့ဖြစ်ချင်တာ တစ်ခုကိုကျားကုတ်ကျားခဲကြိုးစားခဲ့တဲ့အတွက် ရေကြောင်းဦးဆောင်လမ်းပြ ထိပ်တန်း ပုဂ္ဂိုလ်တစ်ယောက် ဖြစ်ခဲ့တာပါ။ အာရှတိုက်ရဲ့ ရေကြောင်းဦးဆောင်လမ်းပြဖြစ်ခဲ့သူ နာမည်ကျော်ကိုလံဘတ်(စ) ထက်စောပြီးကမ္ဘာပတ် နယ်မြေသစ်ရှာခဲ့သူ တစ်ယောက်ဖြစ်တဲ့ ယူနန်နယ်ဖွား ချန်ဟို (ZHENG HE) ဆိုရင်လည်း ငယ်စဉ်က ပင်လယ်ဆိုတာ မမြင်ရတဲ့ ယူနန်နယ်မှာ ကြီးပြင်းပြီး အသက် (၁၀ ) နှစ်မှာ ဖခင်မြို့စားစစ်ရှုံးရာက၊ တရုတ်ဧကရာဇ်က ဖခင်ကိုသတ် သားကိုသင်းကွပ်ပြီး ကျွန်ဇာတ်သွင်း ခံခဲ့ရပါတယ်။ ဒါပေမဲ့ မဆုတ်မနစ် အဆက်မပြတ်ကြိုးစားခဲ့လို့ ကိုလံဘတ်(စ) ရဲ့ နာမည်ကျော် (Santa Maria) သင်္ဘောထက် ငါးဆလောက်ကြီးတဲ့ စစ်သင်္ဘောကြီးပေါင်း (၁၂၀) ကျော်ကိုအုပ်ချုပ်ပြီး တရုတ်ဧကရာဇ် ရဲ့ နယ်မြေသစ်ရှာဖွေပေးသူ ရေတပ်ဗိုလ်ချုပ်မှူးကြီး ဖြစ်ခဲ့ပါတယ်။ ကမ္ဘာ့ထိပ်တန်း နံပါတ်တစ် Maersk လိုင်းရဲ့တည်ထောင်သူဖခင်ကြီး Capt. Peter Maersk Moller ဟာသင်္ဘောသားဘ၀က စခဲ့ပြီး သင်္ဘောလုပ်ငန်းရဲ့စီးပွားရေး အခွင့်အလန်းများကို မြင်ပြီး သူ့သား Arnold Peter Moller နဲ့ သင်္ဘောကုမ္ပဏီလေး စထောင် ပြီးကြိုးစားခဲ့ရာက နှစ်ပေါင်းတစ်ရာကျော်အကြာမှာ ယခုမြင်နေရတဲ့ AP Moller Maersk ဆိုပြီးဖြစ်လာတာပါ။ ။ အခုနေများ ပီကာဆိုရဲ့အမေသာရှိနေဦးမယ်ဆိုရင် ကြီးကျယ်ခန့်ညား နေတဲ့ ရေကြောင်းလောက ကိုတွေ့ပြီး သူ့သားကို အမှာချွေနေ မှာ ကတော့ ((သင်္ဘောသားများဖြစ်ခဲ့ရင် Columbus လို (ဒါမှမဟုတ်) Capt. Peter Maersk Moller လို ဖြစ်အောင်လုပ်ပါ))လို့မှာနေမှာ ကျိန်းသေပါတယ်။ ။။။။။“My mother said to me, ‘If you become a soldier, you will be a general; if you become a monk, you will be a Pope.’ Instead, I became a painter and wound up as Picasso.” [Pablo Picasso]။။။။။။

Capt Win Naing Nyunt (American President Line, APL) Seamen Representative Council Member [MSF]

0 comments:

Post a Comment