Monday, September 2, 2013

သင်္ဘောသား မိသားစုဝင် များ၏ ရင်ဖွင့်သံ အပိုင်း ( ၁ )

သင်္ဘောသား မိသားစုဝင် များ၏ ရင်ဖွင့်သံ အပိုင်း ( ၁ )


သင်္ဘောသားကတော် ဘ၀ကို အမျိုးသမီးတော်တော်များများ အားကျကြလိမ့်မယ်လို့ ထင်ပါတယ်။ တကယ်လည်း အားကျချင်စရာပါ။ တစ်လ USD 3000 ~ 7000 လောက်ရှာနိုင်တဲ့ လူတွေကို ရထားတဲ့ အမျိုးသမီးတွေပဲလေ။
ကိုယ်တွေ့ ခံစားချက်များ ပါသလို သင်္ဘောသားကတော် အန်တီများ၊ မမများ၊ သူငယ်ချင်းများ၊ ညီမလေးများ ရဲ့ ခံစားချက် တွေပါ ထည့်သွင်းဖော်ပြထားပါတယ်။

ရင်ဖွင့်ချက် (၁)

ညီမလေးတစ်ယောက်ကပြောဘူးတယ်။ သူတို့ လက်ထက်ကာစပေါ့ သူက ကွန်ပျူတာနဲ့ နောက်ဆုံးနှစ်မှာ Hons ၀င်တယ်။ သူက ဆက်တက်ပြီး ဆရာမ လုပ်ချင်တယ်။ ဒါပေမယ့် သူ့အမျိုးသားက ပြောတယ် သင်္ဘောသားမိန်းမ က အစိုးရ၀န်ထမ်းလုပ်လို့ မဖြစ်ပါဘူး။ နယ်တွေ ပြောင်းနေရရင် ဘယ်လိုလုပ်မလဲ ဆိုပြီး ကန့် ကွက်တော့ ကျောင်းဆက်မတက်ဖြစ်တော့ဘူး။ အခုတော့ ဘာအလုပ်မှ မလုပ်ဖြစ်တော့ဘဲ ကလေးကျောင်းပို့၊ စာသင်၊ အိမ်မှာ ထမင်းချက် နဲ့ အိမ်ထောင်ရှင်မကြီး လုပ်နေရပြီ။ တသက်လုံးဖြစ်ချင်ခဲ့တဲ့ တကသိုလ် ဆရာမ ဘ၀ကို စွန့်လွှတ်ခဲ့ရပါတယ်။ သူငယ်ချင်းတွေနဲ့ တွေ့ရင် IT ကို နားမလည်တော့တဲ့ ကွန်ပျူတာကျောင်းဆင်းဘ၀ပေါ့တဲ့။
အခုလောက်ဆို သူလည်း သင်ထားတဲ့စာတွေလည်း ကျောင်းပြန်ရောက်နေပြီး သူ့ကလေးတွေနဲ့ အတူတူ မူကြိုစာ ကစပြီး သူပြန်လေ့လာနေပြီထင်ပါတယ်။

ရင်ဖွင့်ချက် (၂)

မမ တစ်ယောက်ကပြောဘူးတယ်။ သူ ကလေးနှစ်ယောက်မွေးတာ သူယောင်္ကျား အနားမှာ တစ်ကြိမ်မှ မရှိခဲ့တဲ့ဘ၀ပါတဲ့။ ဒီအဖြစ်ကတော့ သင်္ဘောသားမိန်းမ တော်တော်များများ ကြုံခဲ့ကြမယ်ထင်ပါတယ်။ ပထမ တစ်ယောက်တုန်းကတော့ အမေတွေ ကမွေးခါနီးကြိုရောက်လို့ အဆင်ပြေတယ်တဲ့။ ဒုတိယ တစ်ယောက်မွေးတဲ့ အချိန်မှာ ကလေးက ထင်ထားတာထက် ကြိုပြီးမွေးတော့ နယ်က အမေတွေ ယောက်ခမ တွေ ချက်ချင်း မလာနိုင်လို့ ကလေးအကြီးပါ ဆေးရုံမှာ ခေါ်ခဲ့ရတယ်။ မိဘတွေရောက်တော့လည်း ကလေးအကြီးက အဖိုးအဖွားတွေနဲ့ စိမ်းနေတော့ သူ့ကိုလည်း ဆေးရုံမှာဘဲ ခေါ်ထားခဲ့ရတယ်။ တခါတလေ အကြီးကလည်း အမေ ကိုကပ်ချင်လို့ ငို၊ အငယ်ကို လည်း ငို၊ ကိုယ်ကိုယ်တိုင်ကလည်း သူ့ အဖေသာရှိရင် ကောင်းမှာ ဆိုပြီး ယောင်္ကျားကိုပါ သတိရ နေလို့ ငိုချင်နေတော့ ကိုယ်ပါရော ငိုခဲ့ရတယ်တဲ့။
ပိုက်ဆံ တွေတော့ ရှိပါရဲ့ဒါပေမယ့် ဒီစိတ်အားငယ်ရတာတွေ ကတော့ ပိုက်ဆံနဲ့ ကုစားလို့ မရခဲ့ပါဘူး။

............................
ဆက်လက်ရင်ဖွင့်ပါအုန်းမည်

မှတ်ချက်... နည်းနည်တော့ကြာမည်ထင်ပါသည်။ မနက်ဖြန်ဆိုလျှင် ရုံးပြန်တက်၊ ကျောင်းပို့၊ သားများကို စာသင်ရမည့် အလုပ်များနှင့် နောက် သောကြာည မှ ဆက်လက် ရင်ဖွင့်နိုင်မည်ထင်ပါသည်။

သို့ပါသောကြောင့် ရင်ဖွင့်ချင်သော ညီအစ်မ များ ကျွန်မ၏
“ ပါရမီဖြည့်ဖက်“ facebook တွင် message အဖြစ်လည်းကောင်း၊
ကျွန်မ၏ gmail account ဖြစ်သော s.b.htun@gmail.com ကိုလည်း ပေးပို့နိုင်ပါသည်။

ပါရမီဖြည့်ဖက် မှ (25 Aug 2013) 06:15 PM တွင် MSU သို့ ရေးသားပေးပို့ပါသည် ။

*************************************

သင်္ဘောသား မိသားစုဝင်များ၏ ခံစားချက်များ ဆောင်းပါးများ ကို MSU ပင်မစာမျက်နှာပေါ်တွင် တင်ပြပေးနေခြင်း နှင့် ပတ်သက်ပြီး သင်္ဘောသားညီကိုများ အနေဖြင့် နားလည်မှု မလွဲမှားစေချင်ပါဘူး ခင်ဗျာ ။ MSU အနေနဲ့ သင်္ဘောသားများ၏ စိတ်ခံစားချက်ကို အဓိက ဦးစားပေး အနေနဲ့ ရည်ရွယ်တာ ဖြစ်လို့ ရေကြောင်းနှင့် ပတ်သက်သော သတင်းများ ၊ စာအုပ်များ ၊ ဆော့ဝဲများ ၊ ဗဟုသုတ ဆောင်းပါးများ အပြင် ၊ အခြား ရသ ဆောင်းပါးများ ၊ သုတ ဆောင်းပါးများ ၊ Troll များ ၊ ဟာသများ ၊ ကဗျာများ စသည်ဖြင့် သုတ ရသ စုံလင်စွာ ပြန်လည် ဖော်ပြပေးနေတာလည်း ဖြစ်ပါတယ် ။ သင်္ဘောသားများနှင့် သင်္ဘောသား မိသားစုများမှာလည်း အမြဲ ဒွန်တွဲတည်ရှိနေတာ ဖြစ်လို့ နှစ်ဦးနှစ်ဘက် အမြင်တွေကို ဆွေးနွေး အဖြေရှာကြရင်းကနေ တစ်ဦးပေါ် တစ်ဦး ပိုမို နားလည်မှုပေးနိုင်သော ၊ သင်္ဘောသားများ ၊ သင်္ဘောသား မိသားစုဝင်များ အဖြစ် ရပ်တည် လုပ်ကိုင်သွားနိုင်ကြပါစေလို့ ဆုမွန်ကောင်း တောင်းပေးလိုက်ပါတယ် ။ ကျေးဇူးတင်ပါတယ် ။
8P @ MSU

No comments:

Post a Comment