Sunday, November 25, 2012

အနှောက်အယှက် အဟန့်အတားများ



ခလုတ်တိုက်လဲခြင်းသည် ကျဆုံးခြင်းမဟုတ် 

( ပေါ်တူဂီ စကားပုံ ) 


လောကတွင် ဘယ်သူမှ အမှားအယွင်း မကင်းနိုင် ။ အမှားလုံးဝ ကင်းချင်လျှင် ဘာမှ မလုပ်ပဲ နေဖို့သာ ရှိသည် ။ သို့သော် လူ့ဘ၀ ရောက်လာပြီး ဘာမှ လုပ်မသွားဘူး ဆိုလျှင် အဲဒါသည်ပင် လူတကာထက် မှားသည့် အကြီးဆုံး အမှားကြီး ဖြစ်သွားလိမ့်မည် ။

ထို့ကြောင့် အလုပ်လုပ်ရလိမ့်မည် ။
လမ်းလျှောက်သောသူ ခလုတ်တိုက်သလို အလုပ်လုပ်သောသူသည် တခါတရံ အမှားအယွင်း ကြုံရမည် ။ အမှား၏ဒဏ်တွေလည်း ခံရမည်သာ ဖြစ်သည်။

သည်အတွက် စိုးရိမ်စရာမလိုပါ ။ ဒါသည် လောက၏ ဓမ္မတာ တစ်ခုသာ ဖြစ်သည် ။ ရာသီဥတု ဟူသည် အမြဲမသာယာ ဆိုးသည့်အခါ ဆိုးသလို ၊ ဘ၀မှာလည်း မုန်တိုင်းထန်သည့်အခါတွေ ရှိပေဦးမည် ။ သို့သော် သည်လေဒဏ် မိုးဒဏ် မုန်တိုင်းဒဏ်တွေကို ကြံ့ကြံ့ခံရင်းပင် လူက ရင့်ကျက်ဖွံ့ဖြိုးရသော သဘောရှိသည် ။

မီးဒဏ် တူဒဏ်ကို နာနာခံပြီးမှ အသားကောင်းသော ဓားတစ်ချောင်း ဖြစ်လာသည် ။ လှိုင်းကြမ်းလေကြမ်းကို အကြိမ်ကြိမ် ဖြတ်သန်းပြီးမှ ကြံ့ခိုင်ကျွမ်းကျင်သော သင်္ဘောသားကောင်း ဖြစ်လာသည် ။ အခက်အခဲ အကျပ်အတည်းတွေသည် အတွေ့အကြုံနုနယ်သူ လုလင်ငယ်တစ်ဦးအား ရင့်ကျက်ထက်မြက်သော ယောက်ျားကောင်းတစ်ဦး အဖြစ်သို့ ပြောင်းလဲပေးနိုင်သော စွမ်းအားရှိကြ၏ ။

သို့သော် အခက်အခဲတွေအပေါ် ထားရှိသည့် တစ်ဦးချင်း၏ သဘောကတော့ အရေးကြီးသည် ။ မတော်တဆ ခြေချော်ကျသည်ကို ငါကျဆုံးပြီဟု မြင်၍ မရ ။ ခလုတ်တိုက်လဲသည့်နေရာမှာ ဆက်လှဲနေမှ တကယ် ကျဆုံးခြင်း ဖြစ်သည် ။

ထို့ကြောင့် ၊ လူ၏ စွမ်းရည်ကို ခလုတ်တိုက် လဲခြင်း မလဲခြင်း နှင့် ဆုံးဖြတ်၍မရ ၊ ခလုတ်တိုက်လဲပြီး ပြန်ထ မထ ဟူသော အချက်ဖြင့်သာ ဆုံးဖြတ်၍ ရနိုင်သည် ဟု ဆိုကြခြင်းဖြစ်သည် ။ နောက်တစ်နေ့တွင် စတိုးဆိုင်တွဲ လုပ်ငန်းရှင် သူဌေးကြီး ဖြစ်လာမည့် ( Frank Woolworth ) ကုန်စုံဆိုင် စဖွင့်တော့ ငါးဆိုင် တွင် သုံးဆိုင်က အရှံးပေါ်သည် ။ သို့သော် သည်လုပ်ငန်းကိုက်မှာမဟုတ်ဘူး ဟူ၍ သူနောက်ဆုတ်မသွား ။ နည်းနာတွေ ပြုပြင်ကာ ဆိုင်အလုပ် ကို ဆက်လုပ်သည် ။ သည့်နောက်တော့ သူ့ဆိုင်တွေ ထင်ရှားအောင်မြင်လာပြီး အမေရိကန် ပြည်အနှံ့မှာ ဆိုင်ခွဲတွေ မှိုလိုပေါက်သည်အထိ ဖြန့်ကျက်နိုင်ခဲ့သည် ။

သည်လူတွေက အနှောက်အယှက် အဟန့်အတား ကို ပဓာန မထား ၊ ကိုယ့်ခရီး ကိုယ်ဆက်နိုင်အောင်သာ အားထုတ်ကြိုးပမ်းတတ်သူမျိုး ဖြစ်သည် ။ သူတို့ကို မအောင်မြင်အောင် တားဆီးထား၍ မရ ။ သူတို့ရှေ့မှာ ခလုတ်ကန်သင်းတွေ ၊ သစ်တုံးကျောက်ခဲတွေ မည်မျှ ချထားထား သူတို့ စိတ်ပျက်မသွား ။ ဒါတွေကိုပင် လှေကားထစ်များပမာ နင်းတက်သွားဦးမည် ဖြစ်သည် ။

အခက်အခဲ ကြောင့် နောက်တွန့် မသွားကြသူတွေမှာ အဓိက အားက ရည်မှန်းချက်ခိုင်မာခြင်း ဖြစ်သည်။ ပန်းတိုင်ကို သူတို့ အာရုံထဲတွင် ရှင်းလင်းစွာ မြင်ထားပြီး ယင်းပန်းတိုင်သို့ ချီတက်ရန် လမ်းကြောင်းများ ၊ လုပ်ငန်းအစီအစဉ်များ လည်း တိတိကျကျချထားပြီး ဖြစ်ရာ ၊ အတွန်းအထိုး အတိုက်အခိုက်တွေကြောင့် လဲတာ ပြိုတာ ရှိချင် ရှိမည် ဖြစ်သော်လည်း ဘေးဘီသို့ ကား တိမ်းချော်ကွေ့ကောက်သွားခြင်း မရှိ ။ တွေ့သမျှ အတားအဆီးကို ကျော်တန်ကျော် ၊ ဖောက်တန်ဖောက်ထွင်းကာ အဖြောင့်အတိုင်း ချီတက်မြဲ ချီတက်ဖြစ်လေသည် ။

စွန်ဆိုသည်မှာ လေစုန်တွင် မတက် ၊ လေကို ဆန်၍သာ တက်စမြဲဟူသော စကားရှိရာ ၊ ရည်မှန်းချက် စွဲမြဲခိုင်မာသူတို့မှာလည်း စွန်များနည်းတူ အခက်အခဲ တွေများလေ ယင်းတို့ကို ထိုးဖောက် ကျော်လွားကာ ပို၍ မြင့်မားသော အောင်မြင်မှု ဆုလာဘ်တွေကို ရရှိလေ ဖြစ်ချေသည် ။ ။

ဆရာ ဖေမြင့် ၏ အားပြင်းသော မြှားတစ်စင်း စာအုပ်မှ

အောင်မြင်ရေးသမားများအတွက် ထက်သန်နိုးကြားရေးစာများ

ကို မူရင်းအတိုင်း ကူးယူ တင်ပြပေးခြင်း ဖြစ်ပါသည် ။ :)

0 comments:

Post a Comment